MAELFU YA WANANCHI WAJITOKEZA KATIKA MKUTANO WA CHADEMA,NCCR, CUF HUKO JANGWANI JIJINI DAR.

     Maelfu  wakazi wa jiji la Dar es salaam  wengi wao wakiwa ni  wafuasi wa vyama vya Chadema ,Cuf na NCCR Mageuzi  wemefurika katika  viwanja vya jangwani kuwasilikza  viongozi wakuu wa vyama hivyo ambapo kwa pamoja viongozi hao  wanapinga  hatua  ya serikali  kuingiza baadhi ya vipengele  katika mswada wa  sheria  ya marekebisho  ya  sheria  ya mabadiliko ya katiba .

Viongozi  hao  wanadai  kuwa  vipengele hivyo vitapelekea kupatikana kwa katiba  ya upande mmoja  na kuongeza kuwa kama mswada huo hautafanyiwa marekebisho, basi  wao  hawatashiriki katika bunge la katiba.
  

Katika viwanja hivyo  ulinzi uliimarishwa kutoka katika vikundi mbalimbali  vinavyomilikiwa na vyama hivyo  huku shamra shamra za huko na kule zikiwa hazikosekani ili mradi kunogesha mkutano.
 

Mwenyekiti wa taifa wa Chadema  na ambaye  ni kiongozi wa kambi ya upinzani bungeni Mh Freeman Mbowe amewataka watanzania kuacha uoga na wasimame imara kudai katiba bora.

 

Naye mwenyekiti wa Cuf Mh Profesa Ibrahim Lipumba  amesema Tanzani inahitaji katiba ambayo italinda na kusimamia rasilimali za taifa  kuweza kutimia kwa usawa na kuzingatia mahitaji ya watanzania wenyewe.

 

Kwa upande wake mwenyekiti wa NCCR Mageuzi  na mbuge wa kuteuliwa amesema hakuna haja ya kutumia  mabavu  na badala yake ameitaka serikali itumie busara zaidi ili kuweza kufikia  mwafaka wa jambo hili.

VIDEO YA JANUARY MAKAMBA AKIONGELEA NIA YAKE YA KUGOMBEA URAIS MWAKA 2015..!

            Mahojiano haya yalifanyika mwishoni mwa wiki iliyopita kupitia Star TV kwenye kipindi cha Medani za Siasa na Uchumi. Mambo yaliyozungumziwa: 
1. Uendeshaji na mwelekeo wa Bunge, 
2. Vijana na Uongozi, 
3. Suala la Urais 2015,
 4. Mwelekeo wa Chama Cha Mapinduzi, 
5. Rushwa na maadili katika Chaguzi.

WAPINZANI WAMTAHADHARISHA KIKWETE....WADAI AKIENDEKEZA KEJELI DAMU ITAMWAGIKA..!!

 
              SIKU moja, baada ya Rais Jakaya Kikwete kusema anashangazwa na uongo wa baadhi ya wanasiasa kumtuhumu juu ya mambo mbalimbali kuhusu mchakato wa Katiba Mpya, viongozi wa vyama vitatu vya upinzani wameibuka na kusema madai hayo hayana msingi wowote.

Viongozi hao ni Mwenyekiti wa Chama cha Demokrasia na Maendeleo (CHADEMA), Freeman Mbowe, Profesa Ibrahim Lipumba (CUF) na James Mbatia (NCCR-Mageuzi).

Wakizungumza na waandishi wa habari Dar es Salaam jana muda mfupi baada ya kumalizika kikao kati yao na viongozi wa Baraza Kuu la Jumuiya na Taasisi za Kiislamu Tanzania, walisema endapo Rais Kikwete atasaini muswada huo kwa kutegemea nguvu ya dola, ataingiza nchi kwenye machafuko.

Kwa upande wake Mbowe, alisema kama Rais atachukuliwa mzaha na kuamua kusaini muswada huo bila kufikiria maslahi mapana ya taifa, nchi itaingia kwenye machafuko na kamwe nguvu ya dola haiwezi kushinda nguvu ya umma.

“Tunarudia kumshauri na kumsihi Rais Kikwete, Katiba ni haki ya Watanzania wote inahitaji busara, ushirikiano, uvumilivu, staa, kuangalia maslahi, kuaminiana na vitu vingine kama hivyo.

“Kama atapuuza na kuanza kukejeli malalamiko yanayotolewa na makundi mbalimbali na kuamua kusaini, hakika taifa litaingia kwenye machafuko, hawezi kupuuza Shura ya Maimamu yenye Waislamu wengi na makundi mengine.

“Kamwe hatuwezi kupiga magoti kwa kuomba Katiba Mpya, hii si zawadi kwa wanasiasa na hatupiganii kupatikana kwa Katiba nzuri kwa maslahi yetu wenyewe, bali kwa Watanzania wote, ndio maana nasema hatuwezi kuomba, tunataka Katiba Mpya iliyoshirikishwa makundi yote.

“Katika suala hili, kuna uwezekano wa kutokea shari au heri, lakini kwa upande wetu hatupo kabisa kwenye shari bali tunataka pawepo na heri kwa kufungua milango, ili kila kundi lisikilizwe na lipate uwakilishi sehemu pale panapowezekana,” alisema.

Kwa upande wake, Profesa Lipumba alisema Rais Kikwete ameanza kuonyesha mwenendo ambao si mzuri kwa maslahi ya taifa.

“Kwanza naomba niseme, Rais Kikwete kawadanganya Watanzania huko Califonia nchini Marekani kupitia jumuiya yao, kule amekwenda kupumzika, asitumie nafasi hiyo kuficha ukweli.

“Tunasema yeye anadanganya, kuliko baadhi ya wanasiasa hao anaowasema, tunataka atambue Katiba ni ya Watanzania wote na sio ya Chama Cha Mapinduzi (CCM),” alisema.

Naye, James Mbatia wa NCCR Mageuzi, alisema kama Rais Kikwete anadai ametumia mapendekezo ya wadau kuteua wajumbe, anapaswa kumweka wazi anayewakilisha kundi la walemavu.

Alisema Shirikisho la Watu Wenye Ulemavu Tanzania (SHIVYAWATA), lilipendekeza majina matatu ili achaguliwe mmojawapo, lakini wote walitupwa nje na kulifanya kundi hilo kujiona halina umuhimu ndani ya jamii.

“Kama kweli anajua ameongozwa na mapendekezo hayo, asimame atueleze kila kundi limewakilishwa na nani, yapo mambo mengi tunayolalamikia tunataka haki itendeke kwa kila Mtanzania,” alisema.

Kwa upande wake, Amiri Mkuu wa Baraza Kuu la Jumuiya na Taasisi za Kiislamu Tanzania, Mussa Yusuph Kundecha, alisema wameungana na upinzani kudai Katiba iliyokidhi matakwa ya Watanzania.

“Tumejadiliana na kuafikiana kuungana, ili Katiba ipatikane yenye mawazo ya makundi yote, kwa bahati nzuri malalamiko yetu Waislamu yamekuwa na uwiano sawa na malalamiko ya wapinzani.

“Sasa kama wote tumekutana na wazo au shida moja, lazima tuamue tufanye nini ili tupate jibu, sasa tunataka muswada urudi bungeni ujadiliwe upya ili kuondoa upungufu uliopo na vipengele vilivyochomekwa kinyemela.

Juzi Rais Kikwete akiwa Marekani alisema anasikitishwa na baadhi ya wanasiasa kueneza uongo kwa kudai hakufuata mapendekezo ya wadau katika kuteua wajumbe, jambo ambalo analipinga.

-Mtanzania

MAANDAMANO YA WAPINZANI YAPIGWA MARUFUKU

            Jeshi la Polisi Jijini Dar es Salaam limepiga marufuku maandamano ya umoja wa vyama vya CUF, NCCR na CHADEMA siku ya Jumamosi yaliyokuwa yamepangwa  kuanzia Tazara hadi Jangwani na Mwenge hadi Jangwani na sehemu mbalimbali ...

Taarifa  iliyotolewa  na kamanda Kova  kupitia  ITV   imeeleza  kuwa  Polisi wamechunguza na kugundua kwamba  maandamano  hayo  yataleta usumbufu kwa watu wengine na kwamba kwa kuwa lengo ni kufika Jangwani basi Viongozi wa vyama hivyo wawaambie wafuasi wao waende Jangwani bila Maandamano.

Source: ITV

UNAFAHAMU MAANA YA MSEMO "PEOPLES POWER...?" YA CHADEMA?, HIVI NDIVYO MAGUFULI ALIVYO UTAFSIRI....

      WAZIRI wa Ujenzi, Dk. John Magufuli amesema kuwa anafurahishwa na salamu ya Chama cha Demokrasia na Maendeleo (Chadema), kwa kuwa kila neno katika salamu hiyo lina maana na linaashiria ushindi.

Magufuli ameyasema hayo wakati akizungumza na viongozi wa sekta ya miundombinu ya barabara wa Mkoa wa Iringa, katika kikao kilichofanyika katika ukumbi wa ofisi za Mkuu wa Mkoa huo, Dk. Christine Ishengoma.

Alisema neno ‘People’ linamaanisha Watanzania waliompigia kura Rais Jakaya Kikwete na ‘Power’ likiwa na maana ya nguvu za rais.

"Mkuu wa Mkoa wewe ni dokta, unafahamu maana ya neno People, yaani ni watu, mimi ninawapongeza sana hawa wanaosema ‘Peoples Power’, kwani neno People ni watu ambao ndiyo Watanzania waliomchagua Rais Kikwete, na Power ni nguvu, hakuna mwenye Power kama rais, maana ya Authority ni Rais Kikwete ambaye ndio tunapata miradi mbalimbali ya barabara, miradi ya umeme na Big Results Now, kwa hiyo mimi ninawapongeza sana wale wanaosema Peoples Power," alisema Magufuli.

Akizungumzia juu ya nidhamu ya fedha, Magufuli alisema kumekuwa na matumizi yasiyostahili kwa baadhi ya Halmashauri juu ya fedha za miradi ya barabara, ambapo wakurugenzi hutumia fedha hizo kulipana posho za vikao.

Aidha Magufuli alisema Halmashauri zinapaswa kuibua vipaumbele na kuvitekeleza ili kupunguza changamoto za wananchi, na kwamba Mkoa wa Iringa utapatiwa zaidi ya shilingi Bilioni 5.6, ambazo zitasaidia kuboresha miundombinu ya barabara za wilaya katika mkoa huo.

Magufuli pia aliitaka Manispaa ya Iringa kubuni barabara za pembezoni ya mji na kujenga kituo kikubwa cha mabasi yaendayo mikoani.

Aidha Dk. Ishengoma alimuomba waziri huyo kulichukulia uzito suala la upanuzi wa barabara ya Mlima Kitonga, kwa madai kuwa ufinyu wa barabara hiyo umekuwa ukichangia usumbufu mkubwa pindi magari yanapokwama na hivyo kuziba barabara hiyo na kusababisha msongamano mkubwa.

DR SLAA:LAZIMA WABUNGE WATANDIKANE MAKONDE NDANI YA BUNGE ILI HESHIMA IWEPO

Mbunge wa Jimbo la Mbeya Mjini, Joseph Mbilinyi ‘Sugu’ amesema tukio la kupigwa ngumi na askari ndani ya Ukumbi wa Bunge lilisababishwa na amri ya Naibu Spika, Job Ndugai na wala siyo askari.

Aidha Sugu alisema ilikuwa vigumu kuvumilia konde alilopigwa na askari wakati akitolewa nje kwenye vurugu zilizotokea bungeni hivi karibuni, ndiyo maana aliamua kulipiza kisasi kwa kutaka kumpiga ngumi na si kichwa kama anavyodai askari.

‘Sugu’ alitoa kauli hiyo wakati akiwahutubia wakazi wa Chunya Mjini kwenye mkutano wa hadhara ulioongozwa na Katibu Mkuu wa Chadema Taifa, Dk Willibrod Slaa ambapo viongozi hao wapo ziarani mkoani Mbeya wakifanya mikutano na wananchi kwa lengo la kuwaeleza ukweli wa kilichomtokea Sugu na wabunge wengine bungeni hivi karibuni.

‘ Sugu’ alidai kuwa Ndugai ni adui wa wapinzani bungeni na kwamba kwa vyovyote vile ilikuwa vigumu kuvumilia kwa mtu yeyote baada ya askari kuanza kupiga wabunge kutokana na amri ya Ndugai.

Naye Katibu Mkuu wa Chadema, Dk Slaa akizungumzia suala hilo alisema kitendo alichofanyiwa Sugu hakikuwa kibaya kwake peke yake, bali hata wananchi waliomchagua.

Hata hivyo, Dk Slaa alisema kwa upande mwingine ili heshima ya Bunge lolote lile duniani iwepo, ni lazima wabunge watandikane makonde ndani ya Bunge na si vinginevyo hivyo hashangai kwa kilichotokea kwa Sugu bungeni.

Dk Slaa, alimjia juu Ndugai akisema alikiuka Kanuni za Bunge kwa kitendo hicho na kubainisha kwamba kanuni za Bunge zipo wazi kabisa kwamba iwapo itatokea vurugu ndani ya Bunge anachotakiwa kukifanya ni kuahirisha Bunge kwa wakati huo.

Pia alisema askari ambao ni wapambe wa Bunge ‘Sargent at arms’ ndio wenye mamlaka ya kuingia ukumbini na endapo itatokea nguvu ya ziada hao ndio wanaotakiwa kisheria na siyo kuwaita askari wa nje ya Bunge kuingia ndani.

Dk Slaa alisema kitendo kilichofanywa na Sugu pamoja na wabunge wengine ni cha kijasiri na aliwataka kutokurudi nyuma na misimamo yao bali waendelee kusonga mbele.
Chanzo: Mwananchi.

SUGU:"NDUNGAI ALIAMURU ASKARI WANIPIGE BUNGENI..."

            NI kauli iliyotolewa na Mbunge wa Mbeya Mjini (Chadema), Joseph Mbilinyi ‘Sugu’  Mbunge wa Jimbo la Mbeya Mjini, Joseph Mbilinyi ‘Sugu’ amesema tukio la kupigwa ngumi na askari ndani ya Ukumbi wa Bunge lilisababishwa na  amri ya Naibu Spika, Job Ndugai na wala siyo askari.

Aidha Sugu alisema ilikuwa vigumu kuvumilia konde alilopigwa na askari wakati akitolewa nje kwenye vurugu zilizotokea bungeni hivi karibuni, ndiyo maana aliamua kulipiza kisasi kwa kutaka kumpiga ngumi na si kichwa kama anavyodai  askari.

‘Sugu’ alitoa kauli hiyo  wakati akiwahutubia wakazi wa Chunya Mjini kwenye mkutano wa hadhara ulioongozwa na Katibu Mkuu wa Chadema Taifa, Dk Willibrod Slaa ambapo viongozi hao wapo ziarani  mkoani Mbeya  wakifanya  mikutano na wananchi kwa lengo la kuwaeleza ukweli wa kilichomtokea Sugu na  wabunge wengine bungeni hivi karibuni.

‘ Sugu’ alidai kuwa Ndugai ni adui wa wapinzani bungeni na kwamba kwa vyovyote vile ilikuwa vigumu kuvumilia kwa mtu yeyote baada ya askari kuanza kupiga wabunge kutokana na amri ya  Ndugai.

Naye Katibu Mkuu wa Chadema, Dk Slaa akizungumzia suala hilo alisema kitendo alichofanyiwa Sugu hakikuwa kibaya kwake peke yake, bali hata wananchi waliomchagua.

Hata hivyo, Dk Slaa  alisema kwa upande mwingine ili heshima ya Bunge lolote lile duniani  iwepo, ni lazima wabunge watandikane makonde ndani ya Bunge  na si vinginevyo hivyo hashangai kwa kilichotokea kwa Sugu bungeni.

Dk Slaa, alimjia juu Ndugai akisema alikiuka Kanuni za Bunge kwa kitendo hicho na  kubainisha kwamba kanuni za Bunge zipo wazi kabisa  kwamba iwapo itatokea vurugu ndani ya Bunge anachotakiwa kukifanya ni kuahirisha Bunge kwa wakati huo.

Pia alisema askari ambao ni  wapambe wa Bunge ‘Sargent at arms’ ndio wenye mamlaka ya kuingia ukumbini na endapo itatokea nguvu ya ziada hao ndio wanaotakiwa kisheria na siyo kuwaita askari wa nje ya Bunge kuingia ndani.

Dk Slaa alisema kitendo kilichofanywa na Sugu pamoja na wabunge wengine ni cha kijasiri na aliwataka kutokurudi nyuma na misimamo yao  bali waendelee kusonga mbele.

WAPINZANI WAUNGANA NA KUKUBALIANA KUFANYA MIKUTANO NCHI NZIMA ILI KUPINGA MCHAKATO WA KATIBA

 
VYAMA vya upinzani nchini, vimeamua kuungana ili kunusuru mchakato wa Katiba mpya. Msimamo huo ulitolewa jana jijini Dar es Salaam, wakati wenyeviti wa vyama hivyo ngazi ya taifa, walipofanya mkutano na waandishi wa habari.

Vyama vilivyofikia uamuzi huo ni Chama cha Demokrasia na Maendeleo (CHADEMA), kilichowakilishwa na Mwenyekiti wake, Freeman Mbowe, Chama cha Wananchi (CUF), kilichowakilishwa na Profesa Ibrahim Lipumba na Chama cha NCCR- Mageuzi, kilichowakilishwa na James Mbatia.

Wakati wa mkutano na waandishi wa habari, aliyesoma tamko lao ni Profesa Lipumba, ambaye alisema ushirikiano wao umelenga kuhakikisha Katiba mpya inapatikana kwa maslahi ya Watanzania.
Alisema kwamba, ushirikiano huo umetokana na Muswada wa Marekebisho ya Sheria ya Mabadiliko ya Katiba Mpya kupitishwa bungeni Septemba 6, mwaka huu, kwa nguvu na wabunge wa CCM.

Alisema kuwa, muswada huo ulipitishwa ukiwa na kasoro mbalimbali, zikiwamo za CCM kuingiza vipengele bila kufuata utaratibu kwa maslahi yao na pia wananchi wa Zanzibar hawakushirikishwa ipasavyo.

“Muswada uliopelekwa bungeni, uliongezwa vifungu vingi ambavyo havikuwamo katika rasimu iliyopelekwa katika Serikali ya Zanzibar, kitendo hicho kinadhihirisha udanganyifu katika Serikali ya Umoja wa Kitaifa katika suala la Katiba ya nchi inayotokana na wananchi.

“Sasa, yaliyojiri bungeni kwa siku tatu kuanzia Septemba 4 hadi 6, mwaka huu na yale yanayoendelea kusemwa na Serikali pamoja na CCM, ni mkakati wa kupitisha Katiba ambayo haikutokana na wananchi. Kwa maana hiyo, wenye nia njema na nchi, waunge mkono tamko hili,” alisema Profesa Lipumba.

Kutokana na kutoridhishwa na mchakato huo, wanasiasa hao walimtahadharisha Rais Jakaya Kikwete, asisaini muswada huo kwa kuwa marekebisho yaliyofanyika na taratibu zilizotumika kuupitisha, zilikwenda kinyume cha majadiliano na vyama na wadau yaliyofanyika mwaka 2011 na 2012.

Pia walimtaka Rais Kikwete kuurejesha muswada huo bungeni, ili ukafanyiwe marekebisho yatakayojenga tabia ya kuaminiana ili kuleta muafaka wa kitaifa wa mchakato wa mabadiliko ya Katiba.

“Tunaanza kuunganisha umma ili kufanya uamuzi mzito wa kunusuru mchakato wa Katiba mpya, ambao unaendelea kutekwa na kuhodhiwa na CCM na tunafanya hivyo kwa kuwa madaraka na mamlaka yote yapo kwa wananchi ambao Serikali inawajibika kwao,” alisema Profesa Lipumba.

Ili kuonyesha kuwa wapinzani hao hawaridhishwi na mchakato wa Katiba mpya, alisema Septemba 21, mwaka huu, utafanyika mkutano wa hadhara wa pamoja eneo la Viwanja vya Jangwani, Dare es Salaam.

Alisema mkutano huo utakuwa ni hatua ya mwanzo ya ratiba za vyama hivyo kuzunguka nchi nzima kuelezea masuala mbalimbali yanayohusu mchakato wa Katiba mpya.

Akizungumza baada ya tamko hilo, Mbatia alisema kama Rais Kikwete ataridhia mchakato huo haramu, uamuzi wake utakuwa ndiyo chanzo cha machafuko nchini.

Alimtahadhirisha Rais Kikwete asiusaini muswada huo kwa sababu anaweza kuandika historia mbaya ya jambo alilolianzisha kwa nia nzuri.

“Mkono wa Rais Kikwete ambao utashikilia kalamu, ndio utakaokuwa na hatma ya taifa hili, anaweza kujenga historia mbaya ya jambo ambalo amelianzisha mwenyewe, ninamuomba aweke maslahi ya taifa mbele kuliko chama chake.

“Mkono wake ukithubutu kusaini muswada huo, ajue ndio mwanzo wa machafuko, tunajua wapo wanaosema anakiharibia chama chake, lakini ajue tunampa ushauri wa bure ili atambue hagombei tena, hivyo hakuna sababu ya kuogopa mtu.

“Tunataka Katiba ya miaka 50 hadi 100 na ifahamike kwamba, Watanzania hawajawahi kuandika Katiba yao, hatutaki CCM kuhodhi na kuifanya ni mali yao.

“Itakumbukwa kwamba, Muungano wa Tanzania na Zanzibar ni tendo la siasa la maridhiano, hivyo hivyo tendo la Serikali ya Umoja wa Kitaifa Zanzibar kati ya CCM na CUF lilifanyika kisiasa na ni la maridhiano.

“Tunaomba CCM waweke itikadi zao pembeni na wote tuseme Tanzania kwanza, siasa baadaye, maslahi ya taifa kwanza, chama baadaye, kwa kauli hiyo, tutapata Katiba mpya.

“Sisi tunashukuru Tume ya Jaji Warioba, kwani imefanya kazi nzuri na kuchukua mawazo ya kila kundi na vyama, yakiwamo ya Serikali tatu, sasa bila vyama vya siasa kuyasimamia haitapatikana Katiba ya Watanzania,” alisema Mbatia.


Mbowe anena
Naye Mbowe alisema haoni sababu uchaguzi wa mwaka 2015, ufanyike chini ya Katiba ya zamani na kuongeza kwamba katiba mpya itapatikana kwa njia yoyote ile.

Mbowe, ambaye alitumia muda mrefu kuwaonya waandishi wa habari, alilifananisha taifa na puto lililojaa upepo ambalo alisema halitakiwi kutobolewa na Rais Kikwete.

Alisema upepo huo ukitobolewa utasababisha machafuko ndani ya nchi na kumtaka Rais Kikwete kutafakari kwa kina kwa kurudisha muswada huo bungeni ili ukajadiliwe upya.

“Chadema hatutaki katiba ya zamani itumike wakati wa uchaguzi wa mwaka 2015, tutaitafuta Katiba mpya kwa njia mbalimbali hadi ipatikane.

“Tunataka kusonga mbele sio kurudi nyuma, hatutapona kama Katiba mpya hii itapitishwa na chama kimoja, naomba tuungane ili kuwa na sauti moja,” alisema.

Aliwataka waandishi wa habari wawe makini katika suala hili, kwa kuwa wao ni wadau muhimu katika kupata Katiba mpya bora.

Pamoja na hayo, alimzungumzia Waziri wa Nchi, Ofisi ya Rais, Mahusiano na Uratibu, Steven Wassira, kwamba amelewa madaraka na kwamba ndiyo maana anatoa kauli za kejeli kwa wapinzani.

Kwa mujibu wa Mbowe, Ikulu siyo mali ya Rais wala wasaidizi wake, bali ni ya Watanzania wote.

Alisema kamwe hawatarajii kwenda Ikulu juu ya suala hilo, bali watakwenda kwa wananchi ambao ndio wenye nguvu na maamuzi ya taifa hili.

KINANA:CCM TUNAPIGA KAZI, WAPINZANI WANAPIGA MAKELELE TU ...

KATIBU Mkuu wa Chama Cha Mapinduzi (CCM), Kanali Mstaafu Abdulrahman Kinana, amesema chama chake hakina muda wa kulumbana na vyama vya upinzani, kwani wajibu wake ni kuchapa kazi. Kinana aliyasema hayo jusi, wakati akihutubia katika mkutano wa hadhara uliofanyika Kahama mjini, ikiwa ni mwendelezo wa ziara yake katika Kanda ya Ziwa.

“Acheni wao wapige kelele, lakini CCM inatekeleza ilani yake kikamilifu kwa kufungua fursa za kiuchumi na hata kuwapatia ajira vijana wetu,” alisema.

Kiongozi huyo wa chama aliisifu China kutokana na mchango wake katika kusaidia kukuza uchumi wa Tanzania na kwamba kwa muda mrefu nchi hiyo imekuwa ikijenga miradi mbalimbali nchini.

“Hii ni pamoja na mradi wa ujenzi wa Bandari ya Bagamoyo ambao utafanywa na Kampuni ya Merchants Holding ya China,” alisema.

Miradi mingine iliyojengwa na China ni pamoja na ujenzi wa Reli ya Tanzania na Zambia (TAZARA), Kiwanda cha Nguo Urafiki, Uwanja wa Taifa wa kisasa wa mpira pamoja na ujenzi wa miundombinu ya barabara na reli.

Kwa upande wake, Mkuu wa Mkoa wa Shinyanga, Dk. Ally Rufunga, alisema kuwa mkoa wake wamejipanga kutangaza fursa za uwekezaji ambapo zaidi ya vijana 1,000 watanufaika.

Akizungumza katika mikutano hiyo, Dk. Rufunga alisema mkoa wake uliunda kamati ya uwekezaji ya mkoa na kufanya mawasiliano na ubalozi wa China, ambapo ulionyesha nia ya kuwekeza mapema mwaka huu.

“Nilifanya mawasiliano na Balozi wa China, Dk. Lu, ambapo aliweza kuyakaribisha makampuni makubwa matatu kutoka China na sasa ujenzi unaendelea Shinyanga,” alisema.

Alisema hiyo ni pamoja na Kampuni ya Xing Hua Investment Ltd, ambayo inajenga kiwanda kikubwa cha kusindika nyama.

“Pia kinajengwa kiwanda cha nyuzi, mafuta ya pamba na nguo pamoja na chuo cha kilimo ambavyo hadi kufika Desemba mwaka huu, vitakuwa vimekamilika,” alisema Dk. Rufunga.

Alisema kutokana na mipango, hasa katika usimamizi na utekelezaji wa ilani ya CCM hadi kufikia mwaka 2015, Mkoa wa Shinyanga utakuwa na viwanda 25.

-Mtanzania

NAPE AMTAKA MBOWE AJIUZULU HARAKA...AWASHAURI WANANCHI KUTUMIA BUSARA KATIKA UCHAGUZI UJAO

       Katibu wa Itikadi na Uendezi wa Chama Cha mapinduzi (CCM),Nape Nnauye amemtaka Kiongozi wa Upinzani Bungeni,Freeman Mbowe kujiuzulu nafasi hiyo mara moja kwa sababu ameshindwa kuiongoza kambi hiyo. 
 

Wito huo uliutoa mjini  Shinyanga Ijumaa jioni alipokuwa akihutubia mkutano wa hadhara wa kuhitimisha ziara ya siku Nne ya Katibu Mkuu wa Chama hicho, Abdulrahman Kinana katika mkoa huo.
 

Nape alisema vurugu zilizotokea hivi karibuni Bungeni ni uthibitisho wa wazi kuwa,Mbowe ameshindwa kuiongoza kambi hiyo kwa kuwa kabla yake hakukuwahi kuonekana fujo na vurugu kama hizo katika chombo hicho kinachoheshimika.
 

Alisema udhaifu wa Mbowe katika kuiongoza kambi hiyo ndiyo unaosababisha ishindwe kufanya kile ambacho Watanzania wanakitarajia kutoka kwa wapinzani.
 

Alisema wanasiasa ambao wanasababisha na kushabikia fujo na vurugu hawafai kwa madai kuwa wanaipeleka nchi mahali pabaya.
 

Hata hivyo, alisema hilo halitafanikiwa kwa sababu Serikali, CCM na Watanzania wapo makini dhidi ya mtu yeyote anayepanga kuwachonganisha. Aliishangaa Chadema kwa kushinikiza wabunge waongezwe kwenye Bunge la Katiba huku ikitaka wengi wa hao watokane na wanasiasa.
 

“Chadema inataka wawakilishi wa wakulima wawe kumi tu wakati wakulima ni asilimia 80 ya Watanzania wote. Hivi kweli wana lengo la kuwatetea Watanzania au maslahi binafsi tu,?”alihoji Nape.

Nape waliwataka wananchi kufanya uamuzi wa busara wakati wa Uchaguzi wa Serikali za Mitaa mwakani na Uchaguzi Mkuu .

DR SLAA AELEKEA MBEYA KUMSAFISHA SUGU

 
               KATIBU Mkuu wa Chama cha Demokrasia na Maendeleo, (Chadema), Dk. Willbroad Slaa, leo anatarajia kuongoza mapokezi makubwa ya kumpokea Mbunge wa Mbeya Mjini, Joseph Mbilinyi ‘Sugu’. Mbunge huyo anafanyiwa mapokezi hayo, ikiwa ni siku tisa tangu kutokea kwa vurugu kubwa bungeni, baada ya Naibu Spika wa Bunge, Job Ndugai kuamuru Kiongozi wa Kambi ya Upinzani Bungeni, Freeman Mbowe, kutolewa ndani ya Bunge.

Hali hiyo ilisababisha mvutano mkali kiasi cha kusababisha Sugu kupigana ngumi na askari kabla na baada ya kutolewa kwa nguvu nje ya ukumbi wa Bunge.

Mbali na kushiriki mapokezi hayo ya Sugu ambaye suala lake hilo limefikishwa polisi mjini Dodoma, Dk. Slaa akiwa katika ziara ya chama mjini Mbeya, anatarajia kuzungumza mambo mazito juu ya ufisadi nchini, ikiwa ni kumbukizi ya tangu alipotangaza orodha ya aibu ‘list of shame’ ya ufisadi na mafisadi nchini.

Siku kama ya leo, Septemba 15, mwaka 2007, Dk. Slaa alitangaza orodha ya mafisadi 11 katika mkutano ulioitishwa na vyama vya upinzani kwenye viwanja vya Mwembe Yanga jijini Dar es Salaam.

Akizungumza na MTANZANIA Jumapili, Ofisa Habari wa Chadema, Tumaini Makene, alisema Dk. Slaa akiwa katika ziara hiyo, atazungumza mambo mbalimbali ikiwa ni pamoja na tathimini ya matukio ya mkutano wa Bunge uliomalizika hivi karibuni.

Alisema pamoja na mambo mengine, leo atatumia kumbukizi hiyo kufunua uozo mwingine unaoendelea kufanywa na viongozi wa Serikali ya CCM.

Akizungumzia mapokezi ya Sugu, Makene alisema yataanzia Isanga hadi uwanja wa Dk. Slaa (zamani mama John), pia ataeleza namna ufisadi ulivyoongezeka lakini msingi wake ukiwa ni ile ile orodha ya aibu ya mafisadi aliyoitangaza hadharani Septemba 15, 2007.

Alisema katika ziara hiyo, Dk. Slaa ataambatana na watendaji kutoka makao makuu, viongozi wa chama pamoja na wabunge wa chama hicho.

TUNDU LISU AKAZA,AKATAA UAMUZI WA CCM KUTAKA KUIFUTA KESI YAKE

WAKATI viongozi mbalimbali wa CHADEMA wakiwasili mjini Dodoma kuungana na Mbunge wa Singida Mashariki, Tundu Lissu, katika rufaa ya kupinga ubunge wake inayoanza kusikilizwa leo, mbunge huyo amekataa uamuzi CCM kutaka kuifuta kesi hiyo.

Juzi CCM kupitia kwa wakili wake, Godfrey Wasonga, iliwasilisha barua katika Mahakama ya Rufaa Dodoma na nakala kwa Lissu ikiomba mahakama hiyo kuifuta kesi hiyo.
 

  Kwa mujibu wa wakili huyo, sababu ya kuomba kufutwa kwa kesi hiyo ni walalamikaji wote kujitoa na kuapa mahakamani kuwa hawakuwa tayari kuendelea na kesi hiyo.
 
Taarifa zilizolifikia gazeti hili jana, zilisema kuwa viongozi kadhaa wa CHADEMA wakiongozwa na Mwenyekiti, Freeman Mbowe, Katibu Mkuu, Dk. Willibrod Slaa, wajumbe wa Kamati Kuu na wabunge kadhaa wa chama hicho tayari walikuwa wamewasili mjini Dodoma.

Hata hivyo, akizungumzia kesi hiyo, Lissu alisema kuwa hatakubali ‘withdrawal’ isipokuwa anataka ‘dismiss with cost’.

Lissu alisema kuwa Wasonga atalazimishwa kulipa gharama kwa kuwa hati ya kiapo cha Selema ni ya mwezi Juni 25, mwaka huu, na kwamba kutaka kuiondoa siku mbili kabla ni uhuni.
 
Shabani Selema na Paskali Hallu ni wanachama wa CCM wakazi wa kijiji cha Makiungu, mkoani Singida, ambao walifungua kesi ya msingi ya kupinga ubunge wa Lissu.
 
Lakini baada ya hukumu ya Mahakama Kuu Kanda ya Dodoma kumtangaza Lissu kama mbunge halali, walikubaliana na hukumu hiyo ya Aprili 27, mwaka huu.
 
Mara kadhaa wananchi hao wamenukuriwa wakimlalamikia Katibu Mkuu wa CCM, Abdulrahman Kinana, kuwa anawashinikiza kuendelea na rufaa hiyo licha ya kwamba walishajitoa.
 
Akizungumza na gazeti hili juzi, Wasonga, ambaye alikuwa akiwatetea wanachama hao katika kesi hiyo, alisema kuwa baada ya kuwasiliana na wateja wake walimwambia hawakuwa tayari kuendelea na kesi hivyo.
 
“Ni kweli walalamikaji wote wamejitoa na mimi kama wakili sioni haja ya kuendelea; nitakuwa namwakilisha nani?
“Niliongea nao jana hakuna; mwenye nia ya kuendelea na kesi,” alisema.
 
Rufaa hiyo imepangiwa kusikilizwa katika Mahakama ya Rufani na Jopo la Majaji watatu, Salumu Massati, Engela Kileo na Natalia Kimaro.
 
Kabla ya kuanza kusikilizwa kwa rufaa hiyo, mahakama ilitarajiwa kusikiliza pingamizi zilizotolewa na upande wa walamikiwa ambao ni Lissu na jamuhuri za kupinga rufaa hiyo na jopo hilo la majaji litatoa maamuzi.
 
Tayari Lissu alitoa hoja saba za kupinga rufaa hiyo, ambazo ni mkata rufaa Seleman ambaye ndiye mlalamikaji namba moja kupinga kwamba hajakata rufaa kwa hati ya kiapo ya Mei 24 mwaka huu.
 
Alisema hoja nyingine ni notisi ya kiapo kutopelekwa kwa mjibu rufaa ambaye ni yeye kinyume na masharti ya kanuni ya 84 (1) ya Kanuni za Adhabu za Mahakama ya Rufaa Tanzania za mwaka 2009.
 
“Vile vile nakala zote rekodi za rufaa hazijathibitishwa usahihi wake na wakata au wakili kinyume na masharti ya Kanuni ya 96 (5) ya Kanuni za Mahakama ya Rufaa Tanzania za mwaka 2009.
 
“Rufaa hii pia imepitwa na muda wake kwa sababu hati ya ucheleweshaji iliyotolewa na Msajili wa Mahakama Kuu haijasainiwa, haina tarehe wala muhuri kinyume na Kanuni ya 90 (1) ya Kanuni za Mahakama ya Rufaa ya Tanzania za mwaka 2009,” alisema.
 
Lissu aliongeza kuwa walalamikaji walitakiwa kukata rufaa siku sitini baada ya notisi ya rufaa kutolewa na kwamba tarehe ya mwisho ya kukata rufaa ilikuwa Julai 3 mwaka jana lakini rufaa hiyo ilikatwa Mei 7 mwaka huu.
 
“Hoja nyingine ni kwamba rufaa hiyo si halali kwa kuwa imeacha nyaraka muhimu ikiwemo maombi ya mwenendo wa shauri wa kusamehewa gharama za dhamana,” alisema.

Lissu alisema pia katika rufaa hiyo, amri iliyomshindisha kesi si halali kwa kuwa haionyeshi tarehe ambayo amri hiyo ilitolewa kinyume na kanuni ya 9 ya Kanuni za Masijala za Mahakama Kuu za mwaka 2005.
 
Alisema pia wakata rufaa wamesindwa kuwasilisha mahakamani hoja za maandishi za kuunga mkono hoja za rufaa yao ndani ya siku 60 au kuomba muda wa kuziwasilisha.
 
Pia hoja nyingine ni kushindwa kuwasilisha hoja hizo za maandishi kinyume cha Kanuni ya 106 (1), (2) na (9) ya Kanuni za Mahakama ya Rufaa ya Tanzania za mwaka 2009.
 
Kesi ya kupinga ubunge wa Lissu ilianza kusikilizwa Machi 12, 2012 na Jaji wa Mahakama Kuu, Moses Mzuna, aliyetoa hukumu April 27, mwaka huu, na kumtangaza Lissu kuwa mbunge halali wa Singida Mashariki kwa kigezo kuwa hoja zote zilizotolewa na wanachama hao wa CCM hazitoshi kutengua au kubatilisha ubunge wake.

-Tanzania Daima

NAPE NNAUYE:CHADEMA WAMEPEWA MAMILIONI YA FEDHA NA WAZUNGU ILI WAKWAMISHE MCHAKATO WA KATIBA MPYA

                CHAMA Cha Mapinduzi (CCM) kimeibua madai mazito dhidi ya Chama cha Demokrasia na Maendeleo (CHADEMA), kuwa kimepewa mamilioni ya fedha kutoka nje ya nchi, kwa nia ya kukwamisha mchakato wa Katiba Mpya.

 CCM kimeibua tuhuma hizo, ikiwa ni siku chache baada ya wabunge wa upinzani kupigana ngumi na askari wa Bunge muda mfupi baada ya kupitisha hoja ya kujadili Muswada wa Sheria ya Mabadiliko ya Katiba.

Wabunge wa upinzani wanapinga sheria hiyo, kwa madai kuwa Zanzibar haikushirikishwa.

Akihutubia mamia ya wananchi katika mkutano wa hadhara uliofanyika jana wilayani Kahama, Katibu wa Halmashauri Kuu, Itikadi na Uenezi, Nape Nnauye, alisema kinachowasumbua Chadema hadi kufikia hatua hiyo ni mamilioni ya fedha waliyopewa kutoka nje ya nchi.

“Wenzetu hawa nasikia wamepewa mamilioni toka nje, kwa kisingizio cha kushiriki mchakato wa Katiba na kama ilivyo kwa vibaraka wengine katika bara la Afrika, lengo la fedha hizo si kuwawezesha kushiriki bali kuanzisha fujo na vurugu ili mchakato usimalizike salama kupata ajenda mwaka 2015, kwani kimsingi hawana mpya.

Nape alidai kuwa mara baada ya rasimu ya kwanza kutoka, Katibu Mkuu wao alikwenda nje ya nchi na kukaa kwa muda na kabla ya kurejea ndipo Chadema wakapanga kuanza kuzunguka na helikopta na hivyo kutaka waseme fedha hizo walikozipata.

“Walichokifanya Chadema bungeni walipanga katika mkakati wao wa 'civil disobedience' ...machafuko ya umma dhidi ya dola, mkakati ambao unaratibiwa kutoka nje na baadhi ya wale waliokuwa wakoloni katika nchi zetu za Afrika,” alisema Nape.

Naye, Katibu Mkuu wa (CCM), Abdulrahman Kinana, alisema chama hicho kimekuwa kikitumia njia ya mkato ili kutafuta madaraka ya lazima kwa Watanzania pamoja na kushindwa kuonyesha lengo katika mchakato wa uundwaji wa Katiba Mpya.

Kutokana na tuhuma hizo, gazeti hili lilimtafuta Msemaji wa Chadema, Tumaini Makene ambaye alisema imekuwa ni desturi ya CCM hasa Nape, kukituhumu chama hicho pamoja na kudai kuwa ana ushahidi wa mamilioni ya shilingi ambayo anashindwa kuthibitisha.

“Tuhuma kama hizo aliwahi kuzitoa awali, watoe ushahidi wa fedha zilikotolewa mbona anatuhumu tu? Serikali kama kiasi kikubwa cha fedha kinapitishwa na inashindwa kuchukua hatua za kudhibiti, basi ni mfu,” alisema Makene.

-Mtanzania

MWIGULU:NIPO TAYARI KUGOMBEA URAIS ENDAPO WANANCHI WATANICHAGUA

 
             Naibu katibu mkuu wa CCM bara, Mh. Mwigulu Nchemba ambaye pia ni mbunge wa Iramba  amefunguka  kuwa  vurugu zilizotekea bungeni wiki  iliyopita  zilisababishwa na kambi ya upinzani kukosa akili na kutumia nguvu kubwa ....

Akiongea  na  mpekuzi wetu , Mwigulu  ameitupia  lawama  kambi  ya  upinzani  na  kudai  kuwa  kambi hiyo  imekuwa ikitumia nguvu nyingi  badala ya akili na  maarifa  huku  ikisahau  kuwa Spika  pekee ndo  mwamuzi wa mwisho kwa jambo lolote ndani  ya bunge....

Mwigulu  alienda  mbali  na  kudai  kuwa, pamoja  na  vurugu hizo  ambazo  zimekuwa  zikifanywa   na  wapinzani  kwa  lengo  la  kujiimarisha  kisiasa, chama  chake  bado  kina imani  kubwa  ya  kushinda  kwa  kishindo  katika  uchaguzi  mkuu  wa  2015  kwa  kuwa  wapinzani  hawana SERA  wala  UBAVU  wa  kushindana  na  CCM  zaidi  ya  makelele na  vurugu.

Baada  ya  Mwigulu  kugusia  michakato  ya  uchaguzi  mkuu  ujao, mpekuzi  wetu  alitaka  kukata  kiu  yake  juu  ya  tetesi  zilizopo  kuwa  CCM wanamwandaa  kugombea  URAIS ...

Akijibu  swali  hilo, Mwigulu  ameweka  wazi  kuwa  yeye  yupo  tayari  kuwatumikia  wananchi  katika  nafasi  yoyote  ile   na  kwamba  wao  ndo  wenye  maamuzi  ya  mwisho.

"Wananchi  ndo  waamuzi  wa  mwisho.Endapo  wataona  ninafaa  kwa Rais, basi  ntafanya  hivyo  kwa  sababu  nipo  tayari  kuwatumikia  katika  nafasi  yoyote.

"Najua  vijana  wengi  wananichukia  kutokana  na  chuki  zinazopandikizwa  katika  mitandao  ya  wapinzani. Ukweli  ni  kwamba  chuki  hizo  zinatokana  na  ukweli  kwamba  mimi  ni  mtu  ninayejua  madhaifu  mengi  ya  wapinzani.

"Natoa  wito  kwa  vijana  wenzangu  kuwapuuza  watu  hao  kwa  kuwa  hawana  nia  njema  na  taifa  hili"..Mwigulu

NDUNGAI ATAJA SABABU ZAKE ZILIZOFANYWA AMTIMUE FREEMAN MBOWE BUNGENI

NAIBU Spika, Job Ndugai ametetea uamuzi wake wa kuagiza kutolewa ndani ya ukumbi wa Bunge, Kiongozi wa Kambi ya Upinzani Bungeni, Freeman Mbowe akisema alikuwa sahihi.

Mabishano hayo ambayo yalisababisha kuibuka kwa vurugu bungeni yalitokea mwishoni mwa wiki, muda mfupi baada ya kipindi cha maswali na majibu, ambapo kiongozi huyo wa Bunge aliruhusu mjadala kuhusu Muswada wa Marekebisho ya Sheria ya Mabadiliko ya Katiba uendelee.

Kutokana na hali hiyo, Mbowe alisimama kutaka kutoa ufafanuzi juu ya mjadala huo, lakini Ndugai alimzima na kumtaka kukaa chini, jambo ambalo halikumfurahisha Mbowe na kumfanya agomee agizo lake.

Akizungumza na MTANZANIA jana kwa njia ya simu, Ndugai alitumia muda mwingi kutetea uamuzi wake na kukosoa hoja za watu wanaompinga juu ya uamuzi wake huo.

Ndugai alisema katika kikao hicho, Mbowe alifanya jeuri kubishana na kiti na kueleza kuwa kanuni za Bunge zinasema hakuna mbunge yeyote atakayesimama kuzungumza bila kuruhusiwa na kwamba uamuzi wa kiti ndiyo wa mwisho.

Ndugai alisema wanaomtuhumu kwamba hakutenda haki kumuamuru Mbowe akae chini, wanafanya hivyo kwa vile hawajui kanuni za Bunge.

Ndugai alisema kwa mujibu wa kanuni, ni Rais wa Jamhuri pekee ndiye anayeruhusiwa kulihutubia Bunge kwa wakati anaoona yeye unafaa, lakini si mbunge.

“Hata rais mwenyewe ni lazima amwandikie barua spika, huu ndiyo utaratibu lakini si mbunge au waziri anayeruhusiwa kusimama kwa wakati anaoutaka yeye kuzungumza akaruhusiwa, ni lazima ataomba ruhusa kwa Spika na kama ipo nafasi ya kufanya hivyo Spika atamruhusu, kama haipo hataruhusiwa.

Alipoulizwa kwamba haoni kama alivunja kanuni kwa kumzuia Kiongozi wa Upinzani bungeni wakati kanuni za mabunge ya Jumuiya ya Madola zinatoa upendeleo kwa kiongozi huyo na waziri mkuu ndani ya Bunge, Ndugai alisema:

“Katika vikao vya Bunge, uamuzi wowote wa Spika unakuwa wa mwisho na hauwezi kupingwa na mbunge au waziri yeyote.

“Mbowe nilimuomba kwa heshima sana atupishe kwanza, nilimuelekeza karibu mara tatu…lakini mtu mzima anavunja utaratibu.

“Huyu Mbowe amejivunjia heshima mwenyewe, hata kanisani anayeendesha ibada ni mtu mmoja tu, na wengine wanapaswa kufuata utaratibu.

“Kwanza Mbowe alijitoa mwenyewe kwenye orodha kwa maandishi na ninayo hapa.... yeye na Halima Mdee, sasa alisimama kufanya nini kama sio ujeuri?

“Kanuni anazijua mimi ningemruhusu tu, lakini kwa ujeuri hakufanya hivyo. Kuna taratibu za bunge, mbunge anakaa chini pale Spika anaposimama na wasome kanuni, sasa hapo mjeuri ni nani?

“Tujifunze kanuni haiwezekani mtu yeyote asimame saa yoyote, kila mmoja hawezi kufanya anavyotaka, kuna taratibu zake, kiti kikimuona atapewa nafasi kama ipo na iwapo kiti kikiridhika,” alisema Naibu Spika.

Awatetea askari wa Bunge
Akizungumzia hatua ya kuwaamuru askari wa bunge kuingia ndani ya ukumbi wa Bunge na kumtoa Kiongozi wa Upinzani, iwapo kama amevunja kanuni, Ndugai alisema hakuvunja kanuni na kufafanua kila askari aliye kwenye viunga vya bunge yuko chini ya himaya ya kiti.

“Kila askari aliye kwenye eneo la bunge au viunga vya bunge kuanzia polisi, usalama wa taifa na wengine wote siwezi kuwataja hapa, hao wote wako chini ya bunge ni Sajent at Arms.

“Askari polisi wote unaowaona bungeni wanaletwa na RPC Dodoma na wanakuwa chini yetu, hakuna askari aliyetoka nje siku ile…. Ni uongo na hawajui kanuni.

“Uamuzi wa kuita wanausalama ndani ya ukumbi ulikuwa ni uamuzi sahihi, hakuna askari aliyetoka nje ya bunge,” alisisitiza Ndugai.

Msekwa amuunga mkono Ndugai
Naye Spika Mstaafu aliyeongoza Bunge la nane, Pius Msekwa alimtetea Ndugai akisema kuwa haoni kosa lolote lililofanywa na kiongozi huyo wa Bunge.

Msekwa ambaye alipata kuwa Makamu Mwenyekiti wa CCM (Tanzania Bara), alisema ni jambo la kawaida ndani ya Bunge, Spika kumuamuru mbunge au waziri kukaa chini pale anapoona inafaa.

“Spika ni sawa na mwenyekiti wa kikao chochote, anayo madaraka ya kuruhusu nani aseme, nani asiseme.

“Tuje bungeni sasa, Ndugai ndiye anayeamua nani aseme, ni sahihi ndiye mwenye mamlaka hayo na ni jambo la kawaida kabisa,” alisema Msekwa.

Akitoa uzoefu wake wa bunge alilokuwa akilisimamia, Msekwa alisema matukio yanayotokea bungeni sasa yamegubikwa na hisia za ujana zaidi na kusisitiza wazee walio nje ya bunge wanatafakari cha kufanya kabla hali haijaharibika.

“Sisi yetu macho… lakini kila zama na kitabu chake, hizi ndio zama za vijana, wakati wetu haya hayakuwapo…lakini ikifikia hatua ya kutaka kuliteketeza bunge lazima tutachukua hatua… lakini dalili sio nzuri,” alisema Msekwa.

-Mtanzania

JK AONJA NGUVU YA CHADEMA MWANZA ISHARA YA VIDOLE VIWILI, PEOPLES POWER YATAWALA

                   RAIS Jakaya Kikwete jana alipata wakati mgumu, baada ya kukutana na nguvu ya Chama cha Demokrasia na Maendeleo (CHADEMA) jijini Mwanza katika ziara yake, huku Waziri wake wa Ujenzi, Dk. John Magufuli, naye akijikuta akizomewa mbele yake.

Mbunge wa Nyamagana, Ezekia Wenje, alivunja mwiko baada ya kujiunga katika msafara huo wa raia akiwa na gari lenye alama za Movement for Change (M4C) lililokuwa limefungwa bendera mbili za CHADEMA.

Hata hivyo maofisa usalama walipata wakati mgumu kulizuia gari hilo lisiwepo katika msafara huo, jambo lililozua tafrani kidogo katika uwanja wa Furahisha ambapo Kikwete alikuwa akihutubia mkutano wa hadhara.

Awali wakati wa uzinduzi wa wodi ya wazazi iliyoko eneo la Butimba, Rais alilazimika kumpa Wenje nafasi ya kuwasalimia wananchi baada ya Mkuu wa Mkoa, Evarist Ndikilo, kutaka kufanya hila ya kumnyima haki hiyo kama mbunge wa jimbo husika.

Baada ya viongozi wote kutambulishwa bila Wenje kutajwa, wananchi walianza kupaza sauti wakitaka mbunge wao naye atambulishwe.

Wenje baada ya kusimama alimshukuru Rais Kikwete kwa kumpa nafasi hiyo lakini akamwomba amvumilie kidogo atoe salamu maalumu ya wana Mwanza.

Kama kawaida ya CHADEMA kwenye salamu yao, Wenje aliwaomba wananchi wakunje ngumi kisha akawasalimu kwa kibwagizo cha peoples… nao wakamwitikia power!

Akiwa katika viwanja vya Furahisha ambapo Rais Kikwete alichelewa kuanza mkutano wake, Wenje alifika hapo na kushangiliwa kwa nguvu na wananchi huku polisi wakiwazuia bila mafanikio.

Ilipofika saa 12 jioni kabla Rais hajaingia uwanjani, wananchi hao walimtaka Wenje awahutubie huku wakidai bendera ya taifa ishushwe kwani muda wake ulikuwa umefika.

Kikwete aliingia uwanjani hapo saa 12:10 akiongozana na viongozi mbalimbali wa chama na serikali lakini wananchi hawakuonyesha kumshangilia badala yake walikuwa wakimwonyesha alama ya vidole viwili inayotumiwa na CHADEMA wakiimba ‘peoples…power’.

Katika hatua ya kushangaza wananchi hao walimshangilia kwa nguvu mbunge wa Ilemela, Highness Kiwia, aliyekuwa ameongozana na Rais huku wakiwazomea Meya wa Manispaa ya Ilemela, Henry Matata, ambaye hakufika kabisa mkutanoni hapo.

Matata alionekana mapema wakati Rais Kikwete akisomewa taarifa ya maendeleo makao makuu ya wilaya hiyo lakini hakufika uwanjani kabisa katika viti vya mbele alionekana naibu wake, Swila Dede.

Baadhi ya wananchi hao walisikika wakisema chini kwa chini kuwa Matata ni mwizi hawataki kumsikia lakini shangwe na nderemo zikajiri pale walipotambulishwa Wenje na Kiwia.

Rais Kikwete akiwa wilaya ya Ilemela, wananchi wengi waliokuwa wamesimama njiani walimwonyesha vidole viwili ikiwa ni alama CHADEMA.

Hata hivyo, hali hiyo ilionekana kumkera kiongozi huyo wa nchi pamoja na maofisa wa usalama, ambapo wana usalama wakiwemo polisi walionekana wakiwatisha na kuwazuia wananchi kunyoosha vidole viwili.

Magufuli azomewa

Waziri wa Ujenzi, Dk. Magufuli, alikumbana na jinamizi la kuzomewa mbele ya Rais baada ya kusimama jukwaani na kutaja jina la Matata, ambapo wananchi wengi walimzomea kwa miluzi huku wakimnyooshea vidole viwili.

Adha Magufuli alizomewa pia aliposema wabunge wa Ilemela na Nyamagana jijini hapa ni wana CHADEMA lakini ndani ya roho zao ni wana CCM.

Pia aliendelea kuzomewa aliposema kuwa iwapo Rais angehitaji kupokea kadi za CHADEMA zilizorudishwa angepokea nyingi.

“Mheshimiwa Rais, nampongeza Meya Matata (akazomewa), lakini pia wabunge wa Ilemela na Nyamagana wanachapa kazi vizuri, nje CHADEMA lakini ndani wao CCM (akazomewa).”

Akizungumza katika mkutano huo, Rais Kikwete alimpongeza mbunge wa Nyamagana kwa uchapakazi mzuri hasa kusimamia sekta ya elimu na kwamba wabunge wa namna hiyo wanastahili kuigwa.

Hata hivyo, alisema serikali yake imejipanga vizuri kuhakikisha usafiri wa reli, ndege, majini na barabara za lami vinaboreshwa maradufu kwa ajili ya maendeleo ya wananchi.

“Serikali yangu imeweka nguvu kubwa katika kuboresha sekta ya uchukuzi, ujenzi na nyinginezo. Hii ni kutaka kuwaletea wananchi wetu maendeleo ya kisekta,” alisema.

Baadhi ya mawaziri walioongozana na Rais mbali na Magufuli ni Naibu Waziri, Ofisi ya Makamu wa Rais, Charles Kitwanga, Waziri wa Kilimo, Chakula na Ushirika, Christopher Chiza, Waziri wa Maji, Prof. Jumanne Maghembe, Naibu Waziri wa Ujenzi na Dk. Charles Tizeba.

CHADEMA WAMKANA AFANDE SELE....WADAI HAWAJAWAHI MUOMBA AGOMBEE UBUNGE MOROGORO

Gazeti la Habari Leo la siku ya leo tarehe 2 Septemba lenye kichwa cha habari "Chadema kuzoa wasanii mastaa" pamoja na mambo mengine, mwandishi amemnukuu mmoja wa wasanii toka mkoa wa Morogoro akisema amewahi kuombwa na viongozi wa mkoa wa CHADEMA kugombea Ubunge.

NAOMBA KUWEKA KUMBUKUMBU SAHIHI.
1. Mimi ndiye mwenyekiti wa CHADEMA mkoa wa Morogoro, ninayeongoza Baraza la Uongoz la mkoa lenye wajumbe wa5 tu tangu mwaka 2009.
2. Katika vikao vyetu vyote hukujawahi kuwepo kwa AGENDA ya kumuomba/ kumshawishi mtu yeyote kugombea nafasi yoyote.
3. Hatujawahi kumuomba Afande Sele kugombea. Mbali na hilo hatujawahi hata kumuomba tu kujiunga na CHADEMA.  
  4. Kwa upande wa gazeti la Habari leo, naungana na kauli ya JB kwamba, kuna dalili za wazi kwamba habari hii imepikwa na mwandishi mwenyewe.

Asanteni Makamanda.
PUUZENI TAARIFA HIISusan Limbweni Kiwanga 

LADY JAYDEE, AFANDE SELE, MKOLONI NA JB WAKIMBILIA CHADEMA

CHAMA cha Demokrasia na Maendeleo (Chadema) kimeendelea kuwavuta wasanii kujiunga na chama hicho, ambapo sasa wasanii wanne wa muziki wa kizazi kipya, maarufu Bongofleva na filamu, wanatarajiwa kutangazwa kuhamia chama hicho wiki hii. 

Wasanii hao wanadaiwa tayari kukubali kuingia kwenye chama hicho na wanatarajiwa kutangazwa rasmi hadharani katika mkutano wa hadhara utakaofanyika jijini Dar es Salaam.

 

Kukubali kwao kuingia katika siasa, kunatajwa kutokana na ushawishi mkubwa uliofanywa na wabunge vijana wa chama hicho, pamoja na Diwani wa CCM kutoka kata moja ya Wilaya ya Kinondoni, ili chama hicho kivune kura za vijana katika uchaguzi mkuu wa 2015.

 

Wabunge hao wa Chadema na majimbo yao katika mabano ni Halima Mdee (Kawe); Kabwe Zitto (Kigoma Kaskazini); John Mnyika (Ubungo) na Joseph Mbilinyi, jina la kisanii Sugu (Mbeya Mjini).

 

Habari kutoka kwa watu wa karibu na wasanii hao pamoja na ndani ya Chadema, zinawataja wasanii hao kuwa ni wanamuziki Judith Wambura maarufu Lady Jaydee na wa miondoko ya Hip hop, Selemani Msindi ama Afande Sele.

Taarifa zinawataja wengine kuwa ni mwanamuziki Fredy Maliki maarufu Mkoloni na mwigizaji wa filamu, Jacob Steven kwa jina la kisanii JB.

 

Inadaiwa wasanii hao lengo la kuingia katika siasa kupitia chama hicho, ni kuwania ubunge ambapo Jaydee anatajwa kutaka kugombea wilayani Musoma; Afande Sele Morogoro Mjini; Mkoloni Jimbo la Tanga na JB Jimbo la Mkoa wa Dar es Salaam.

 

Hata hivyo gazeti hili lilipowatafuta kuzungumzia taarifa hizo wote walikana ingawa wapo waliokiri kushawishiwa kuingia kwenye chama hicho na viongozi wa Chadema na wananchi, ili wagombee ubunge.

 

 Afande Sele alikana kujiunga na chama hicho na kusema hana taarifa hizo isipokuwa ni kweli ameshawahi kufuatwa na viongozi wa Chadema wa Mkoa wa Morogoro, wakimtaka ajiunge na chama hicho na agombee ubunge Morogoro Mjini.

 

“Nimeshafuatwa na viongozi wa Chadema wa mkoa na kata nijiunge na chama hicho na nigombee ubunge …tena hata vijana wengi na baadhi ya wazee wamenitaka nigombee ubunge kwa kupitia Chadema lakini nimekataa.

 

“Pia Sugu ni mshikaji wangu na anapokuja Morogoro, vijiwe vyake ndio vyangu naye vijana wameshamfuata wakimwambia anishawishi nigombee ubunge kupitia Chadema, amekuwa akiniambia vijana wananitaka lakini mimi sitaki, sijawahi kujiunga na chama chochote na naona mbunge wa sasa (Abdulaziz Aboud) anafanya kazi nzuri.

 

“Mimi sio mwanasiasa, lakini ni mwanaharakati kupitia muziki na mtandaoni na nimekuwa nikitoa maoni mengi na kukosoa lakini narudia si mwanasiasa na sijawahi kujiunga na chama chochote,” alisema Afande Sele.

 

Vilevile amekanusha kushawishiwa na viongozi wa kitaifa wa Chadema au wabunge, ingawa amekiri kuna wabunge wa chama hicho kuwa ni marafiki zake wakiwemo Mbilinyi na Zitto.

 

Kwa upande wa Jaydee alisema hafuati itikadi ya chama chochote cha siasa na hapendi siasa kutokana na imani kuwa siasa ni uongo na yeye hapendi uongo. Alisema hana nia ya kujiunga na chama chochote cha siasa wala kugombea ubunge kupitia chama chochote.

 

Hata hivyo alipoulizwa iwapo atagombea baada ya Katiba kuruhusu mgombea binafsi, alisema kwa wakati huo atajua.

Hata hivyo, Licha ya kuwaona wanasiasa ni waongo, anakiri wapo wanasiasa anawaamini kutokana na kazi zao na kumtaja miongoni mwao ni Mwenyekiti wa UDP, John Cheyo na Mbunge wa Afrika Mashariki, Shy-rose Bhanji.

 

Mwanamuziki huyo alisema licha ya kuwa na marafiki wa Chadema na CCM kama Sugu na Profesa Jay wa Chadema na Mbunge wa Viti Maalumu, Catherine Magige na Bhanji wa CCM, hawajawahi kumshawishi kujiunga na vyama vyao. 

 

Mkoloni Akizungumzia taarifa hizo za kujiunga na Chadema, JB alikana na kusema; “mimi na siasa ni vitu tofauti, sijawahi kufuatwa na mtu wa Chadema na angalau kungekuwa na dalili basi uniulize, hiyo ni taarifa ya kutengenezwa na wewe ndiye uliyetengeneza hakuna aliyekupa ni udaku huo.”

 

Kwa upande wa Mkoloni, alisema hajawahi kufuatwa wala kushawishiwa kujiunga na chama chochote, isipokuwa ni mwanachama wa muda mrefu wa Chadema na amekuwa akishiriki kampeni, mikutano ya hadhara na matukio yote ya uhamasishaji ndani ya chama hicho. 

Alisema kuhusu kuombwa kuwania jimbo mkoani Tanga kwa tiketi ya chama hicho, alisema hajawahi kuombwa na chama hicho kufanya hivyo.

 

“Sijawahi kuombwa nigombee jimbo, na kuhusu nia ya kugombea, ni mapema mno kuzungumzia suala hilo sasa na hata kanuni za chama changu haziruhusu labda uniulize swali hilo mwakani naweza kuwa na jibu,” alisema Mkoloni.

 

Kwa upande wake, Katibu Mkuu wa Chadema, Dk Willibrod Slaa, alikataa kuzungumzia taarifa hizo akidai yuko barabarani na masuala yote yanayohusu chama hicho aulizwe Msemaji wa chama hicho.
 

Hata hivyo msemaji wa chama hicho, Tumaini Makene alisema hana taarifa kuhusu kufanyika kwa mkutano wa chama hicho Dar es Salaam na kutaka apewe muda afuatilie taarifa hizo.

-Habari leo

TUNDULISU:CUF NI CHAMA CHA ZANZIBAR

Mbunge wa Singida Mashariki mh Tundu Lissu,amesema kuwa CUF ni chama cha Zanzibar. Akizungumza kipitia Star tv ktk kipindi kiitwacho MEDANI ZA SIASA NA UCHUMI.
Akihojiwa na mtangazaji wa star tv amesema kuwa hakuna haja ya kutafuta ushahidi kuhusu hilo kwani tangia kuanzishwa kwa vyama vingi nchini Tanzania CUF haijawahi kupata wabunge zaidi ya 3 wa kuchaguliwa huku bara. Hii inaonyesha wazi kwamba CUF ngome yake ni Zanzibar.
Akiulizwa kuhusu CDM kuwa kutokuwa na Wabunge Zanzibar,alijibu kuwa ni kweli ila ukweli ni kuwa uweze kushinda uchaguzi Tanzania huitaji kushinda Zanzibar. Kwanza Zanzibar haina hata kura milioni moja zaidi sana ni kura laki tano,na Jimbo la Ubunge pekee lina zaidi ya kura laki nne.
Huyo ndie Tundu Lissu Mnadhimu mkuu wa kambi ya upinzani Bungeni. Je yawezekana ni kweli CUF ni chama cha Zanzibar?

MADIWANI WALIOTIMULIWA BUKOBA WARUDSHWA

TAARIFA KWA VYOMBO VYA HABARI

Kamati Kuu ya Halmashauri Kuu ya Taifa imejadili na kutolea maamuzi pamoja na mambo mengine suala la Madiwani wanane waliotangazwa kufukuzwa uanachama na Halmashauri Kuu ya CCM Mkoa wa Kagera.

Katika maamuzi yake, Kamati Kuu imebatilisha uamuzi uliofanywa na Halmashauri Kuu CCM ya Mkoa wa Kagera Agosti 13, 2013 wa kuwafukuza uanachama Madiwani hao. Hivyo Madiwani hao wanane ni wanachama halali wa CCM.

Kamati Kuu imetoa uamuzi huo, baada ya kubaini kuwa Halmashauri Kuu ya CCM Mkoa wa Kagera haikuzingatia Katiba ya CCM ya 1977 Toleo la 2012 Ibara ya 93 (15). Ibara hiyo inasomeka kuwa moja ya kazi ya Halmashauri Kuu ya CCM Mkoa ni:-

“Kumwachisha au kumfukuza uongozi kiongozi yeyote ambaye uteuzi wake wa mwisho unafanywa na 

Halmashauri Kuu ya CCM ya Mkoa, isipokuwa kwa suala la kumvua uanachama au uongozi Diwani lisifanyike hadi Kamati Kuu imearifiwa na kutoa maelekezo”.

Aidha, Kamati Kuu imewaonya Madiwani wa CCM wa Manispaa ya Bukoba, Mbunge wa Bukoba Mjini na Meya kwa kusababisha kukosekana kwa utulivu, mshikamano na amani katika Manispaa na Chama.

Kamati Kuu pia imeitaka Serikali kufanya ukaguzi wa haraka wa mambo yanayolalamikiwa dhidi ya Meya ili ukweli ujulikane na hatua stahiki zichukuliwe kwa mujibu wa sheria na taratibu zinazoongoza Serikali za Mitaa.

Wakati tuhuma hizo dhidi ya Meya zikichunguzwa; Kamati Kuu inawataka Madiwani wa CCM  kurejesha utulivu kwenye Manispaa na Chama kwa ujumla ili kufanikisha utekelezaji wa Ilani ya Uchaguzi ya CCM na kuwaletea maendeleo wananchi wa Bukoba.

Imetolewa na:-

Nape Moses Nnauye,
KATIBU WA HALMASHAURI KUU YA TAIFA YA CCM
ITIKADI NA UENEZI
27/08/2013
Nape Moses Nnauye
CCM Secretary for Ideology & Publicity